ଡିସେମ୍ବର ୩୦ନେ ଚାଷୀ ସଂଗଠନ ସାଙ୍ଗେ କେନ୍ଦ୍ରର ବୈଠକ
ଦିଲ୍ଲୀ ବିଜ୍ଞାନ ଭବନନେ ହେବା ଚାଷୀ ଆରୁ କେନ୍ଦ୍ର ସରକାରକଁର ଭିତରେ ଆଲୋଚନା
କେନ୍ଦ୍ରର ନୂଆଁ କୃଷି ଆଇନ୍କେ ବିରୋଧ୍ କରିକିନା ଇହାଦେ ଭିଲ୍ ସିଂଘୁ ସୀମାନେ ଧାରନାନେ ବସିଛନ୍ ହଜାର ହଜାର ଚାଷୀ । ବାରମ୍ବାର ସରକାର ଆରୁ ଚାଷୀକଁର ଭିତରେ ବୈଠକ ଆରୁ ଆଲେଚନା ହେଇଥିଲେ ଭିଲ୍ କେନସି ସମାଧାନ୍ ଇହାଦେ ତକ୍ ବାହାରି ନାଇଁପାରି । ସେଆଡେ କେନ୍ଦ୍ର ସରକାର ଆରଘାଏ ଚାଷୀ ସଂଗଠନ୍ ମାନକୁଁ ଆଲୋଚନା କରବାର ଲାଗି ପ୍ରସ୍ତାବ ଦେଇଥିଲେ ।
ପହେଲା ଚାଷୀ ସଂଗଠନ୍ ଇଥରେ ରାଜି ନାଇଁ ହେଇଥିବାର ବେଲକେ ଇହାଦେ ହଁ କରିଛନ୍ । ପହେଲା ଡିସେମ୍ବର ୨୯ ତାରିଖନେ ବୈଠକ କରବାର ଲାଗି କହିଥିବାର ବେଲେ ଇହାଦେ ଫେର୍ ଆଏବାର ୩୦ ତାରିଖନେ ବୈଠକ କରାଯିବାର ନେଇକରି କେନ୍ଦ୍ର ଆଡୁ କୁହାଯାଇଛେ । ଆଏବାର ଡିସେମ୍ବର ୩୦ ତାରିଖନେ ଦିଲ୍ଲୀ ବିଜ୍ଞାନ ଭବନନେ ବୈଠକ କରାଯିବାର ନେଇକରି ଚାଷୀ ସଂଗଠନ୍ ମାନକୁଁ କୁହାଯାଇଛେ । କେନ୍ଦ୍ର ସରକାର ଆଘୋନା ନୂଆଁ କୃଷି ଆଇନନେ ସଂଶୋଧନ୍ କରବାର ଲାଗି ପ୍ରସ୍ତାବ ଦେଇଥିଲେ ଯେନଟା ଚାଷୀ ସଂଗଠନ୍ ରାଜି ନାଇଁ ହେଇଥାଇ ।
ନୂଆଁ ତିନହି କୃଷି ଆଇନ୍କେ ପୁରା ବଦଲାବାର ଲାଗି ଚାଷୀ ସଂଗଠନ୍ ଦାବି କରିକିନା ଆଲୋଚନାନେ ସାମିଲ ହେବାକେ ମନା କରିଦେଇଥିଲେ । ଗଲା ଗୁଟେ ମାସ୍ ହେଲାନ ଚାଷୀ ନୂଆଁ କୃଷି ଆଇନ୍କେ ବିରୋଧ୍ କରିକିନା ଧାରନାନେ ବସିରହିଥିବାର ବେଲକେ ଇହାଦେ ସରକାରକଁର ସାଙ୍ଗେ ଆଲୋଚନା କରବାର ଲାଗି ରାଜି ହେଇଛନ୍ । ଆଏବାର ୩୦ ତାରିଖନେ ହେବାକେ ଥିବାର ଇ ବୈଠକନେ ଇତାର ସମାଧାନ୍ ହେବା କି ନାଇଁ ସେଟା ଆଗକେ ଜନାପଡବା ।
