କେଭେ ହେବା ବରଗଡ଼- ନୂଆପଡ଼ା ରେଲ୍ ପ୍ରକଳ୍ପ କାମ୍
ରେଲ୍ ବିଭାଗ ଆଡୁ ପ୍ରକଳ୍ପ ସର୍ଭେ ରିପୋର୍ଟ ମଗାସରିଥିଲେ ଭିଲ୍ ନାଇଁ ଆରମ୍ଭ ହେଇପାରବାର କାମ୍
ବରଗଡ଼ ସହର ସାଙ୍ଗେ ନୂଆଁପଡାକେ ରେଲ୍ ଲାଇନ୍ ସଂଯୋଗ କରବାର ଲାଗି କେନ୍ ଦିନୁ ଇଠାନର ଲୁକେ ଦାବି କରି ଆସୁଛନ୍ । ନୂଆପଡ଼ା ସାଙ୍ଗେ ଛତିଶଗଡ଼ ରାଜଧାନୀ ରାୟପୁର, ପଦ୍ମପୁରକେ ରେଲ୍ ଲାଇନ୍ ସଂଯୋଗ କରବାର ଲାଗି ଭିଲ୍ ଦାବି ହେଇଛେ । ଇ ରେଲ୍ ଲାଇନ୍ଟା ହେଲେ ବରଗଡ଼ ସାଙ୍ଗେ ନୂଆପଡ଼ା ଜିଲ୍ଲାର ଭିନ୍ ଭିନ୍ ଜାଗା ସଂଯୋଗ ହେବା ର ସାଙ୍ଗେ ବିକାଶର କାମ୍ ଆଗକେ ବଢବା । ନୂଆପଡ଼ା ଆର ନଦ୍ମପୁରକେ ନେଇକରି ଭିଲ୍ ନୂଆଁ ଅର୍ଥନୀତିକ କରିଡର ହେଇପାରବା । ହେଲେ ଇହାଦେ ତକ୍ ଇ ଦିଗନେ ସରକାର କେନସି ପଦକ୍ଷେପ୍ ନାଇଁନେଇଥିବାର ଅଭିଯୋଗ ହେଇଛେ । ବରଗଡ଼ ରାୟପୁର ଭାୟା ନୂଆପଡ଼ା, ବିଜେପୁର ରେଳ ଲାଇନ୍ ଲାଗି ପହେଲା ୨୦୦୩ ମସିହାନେ ରେଲ ବିଭାଗ ଆଡୁ ଗୁଟେ ସର୍ଭେ ଭିଲ୍ ହେଇଥିଲା ।
ସେତକି ବେଲେ ଇ ପ୍ରକଳ୍ପ ଲାଗି ୪୧୫.୮୯ କୋଟି ଟଙ୍କାର ଖର୍ଚ୍ଚା ଲାଗି ଗୁଟେ ହିସାବ କରାଯାଇଥିଲା । ୨୦୧୮ ରେଲ ବିଭାଗର ମ୍ୟାନେଜିଂ ଡିଜିଏମ ବରଗଡ଼ ଆର ନୂଆପଡ଼ା ଜିଲ୍ଲାପାଲକୁଁ ଚିଠି ଲେଖିକରି ଇ ବାବଦେ ପ୍ରସ୍ତାବିତ୍ ରେଲ ପ୍ରକଳ୍ପର ଟ୍ରାଫିକ୍ ସମ୍ପର୍କିତ୍ ତଥ୍ୟ ମାଗିଥିଲେ । ଜିଲ୍ଲାପାଳମାନେ ଭିଲ୍ ବିଭାଗକେ ଇ ବାବଦେ ରିପୋର୍ଟ ଦେଇଥିଲେ । ହେଲେ ଇହାଦେ ତକ୍ କାମ୍ ନେଇକରି କେନସି କଥା ନାଇଁ ଦିସବାର । ପ୍ରସ୍ତାବିତ୍ ପ୍ରକଳ୍ପ ହିସାବେ ରେଲ୍ ଲାଇନ୍ଟା କରାଗଲେ ବରଗଡନୁ ରାୟପୁର ୨୩୫ କିଲୋମିଟର ରାସ୍ତା କମ୍ ପଡତା । ଗୁଟେ ଆଡେ କାମ୍ ନାଇଁ ହେଉଥିବାର ବେଲକେ ଜଲଦି ଇ ଦିଗନେ କାମ୍ ମୁଲ୍ କରବାର ଲାଗି ଦାବି ହେଉଛେ ।
