ଟ୍ରମ୍ପକଁର ସମର୍ଥକକଁର ବିକ୍ଷୋଭ୍, କ୍ୟାପିଟଲ ଭିତରକେ ପଶିକରି କଲେ ଭଙ୍ଗାରୁଜା
ଦଙ୍ଗା ଘଟନାନେ ଦୁଃଖ ଜନାଲେ ପ୍ରଧାନମନ୍ତ୍ରୀ ମୋଦି, କହେଲେ ଶାନ୍ତି ହିସାବେ କ୍ଷମତା ହସ୍ତାନ୍ତର ହେଉ
ଆମେରିକା କ୍ୟାପିଟାଲ ଭିତରକେ ପସିକରି ବିରୋଧ ପ୍ରଦର୍ଶନ୍ କରିଛନ୍ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପକଁର ସମର୍ଥକ ମାନେ । ଟ୍ରମ୍ପକଁର ହାର୍ନେ ରାଗିକରି ତାକଁର ସମର୍ଥକମାନେ ଜବରଦସ୍ତି କ୍ୟାପିଟଲ ଭିତରକେ ଢୁକି ଯାଇଥିଲେ । ଇ ସମିଆଁ ପୁଲିସ ଆରୁ ଟ୍ରମ୍ପ ସମର୍ଥକ ସାମ୍ନାସାମ୍ନି ହେଇଥିଲେ । ପୁଲିସ ଇମାନକୁଁ ଅଟକାବେ ଚେଷ୍ଟା କରିଥିବାର ବେଲକେ ଜନକଁର ମରନ୍ ହେଇଥିବାର ନେଇକରି ଜନାପଡିଛେ ।
ଯାଞ୍ଚ ହେଇନାଇଁ ଥିବାର ଭିଡିଓ ମାନକେ ଦେଖାଯାଉଛେ ଯେ, ପ୍ରତିବାଦନେ ଭାଗ ନେଇକରି କ୍ୟାପଟଲ ଭିତରକେ ଢୁକିଥିବାର ଜନେ ମହିଲାକୁଁ ଗୁଲି ମାଡ୍ ଲାଗିଛେ ଆରୁ ତାକୁଁ ରକ୍ତାତ ଅବସ୍ଥାନେ ମେଡିକାଲ ନିଆଯାଉଛେ । ପଛେ ମହିଲା ସମର୍ଥକକଁର ମେଡିକାଲ୍ନେ ଜୀବନ୍ ଯାଇଥିବାର ନେଇକରି ଜନେ ପୁଲିସ ଅଧିକାରୀ କହିଛନ୍ । ସୂଚନା ହିସାବେ ଟ୍ରମ୍ପକଁର ସମର୍ଥକମାନେ ଜୋ ବାଇଡେନ୍କଁର ବଦଲେ ରାଷ୍ଟ୍ରପତି ଟ୍ରମ୍ପକୁଁ ବିଜୟୀ କରାଯାଉ ବଲି ଦାବି କରିଥିଲେ ।
ବୁଧବାର ଦିନ ଯୁକ୍ତରାଷ୍ଟ୍ର ଆମେରିକା ସାଂସଦମାନେ ୨୦୨୦ ଆମେରୀକିୟ ନିର୍ବାଚନନେ ରାଷ୍ଟ୍ରପତି- ନିର୍ବାଚିତ ଡେମୋକ୍ରାଟିକ୍ ଜୋ ବାଇଡେନ୍କଁର ଜିତ୍କେ ଔପଚାରିକ ସ୍ୱୀକୃତି ଦେବାକେ ପ୍ରସ୍ତୁତି କରାଯାଉଥିଲା । ଇ ସମିଆଁନେ ଟ୍ରମ୍ପ ସମର୍ଥକ କ୍ୟାପିଟଲ ଭିତରକେ ଢୁକିକରି ଭଙ୍ଗାରୁଜା କରବାର ସାଙ୍ଗେ ବିକ୍ଷୋଭ କରିଥିଲେ । ସେଆଡେ ଏନ୍ତା ପରିସ୍ଥିତି ବାଦ୍ ୱାସଂଟନ୍ନେ ବେଲବୁଡାର ୬ ବଜା ତକ୍ କଫ୍ରୁ୍ୟ ଜାରି କରାଯାଇଥିଲା ।
ରାଷ୍ଟ୍ରପତି ନିର୍ବାଚନକେ ନେଇକରି ଟ୍ରମ୍ପ କରୁଥିବାର ଭିତ୍ତିହୀନ ଦାବି ଆର ଯୁକ୍ତରାଷ୍ଟ୍ର ଆମେରିକାର କ୍ୟାପିଟାଲ୍ ଦଙ୍ଗା ଉତାରୁ ଇହାଦେ ଟ୍ରମ୍ପକଁର ଫେସବୁକ୍ ଆରୁ ଟୁଇଟର୍ ଆକାଉଣ୍ଟ ବ୍ଲକ୍ କରିଦିଆଯାଇଛେ । ଏନ୍ତା ଘଟନା ଉତାରୁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଲ୍ ପ୍ରତିକ୍ରିୟା ରଖିଛନ୍ । ସେ ଏନ୍ତା ଘଟନା ଶୁନିକରି ଦୁଃଖ୍ ଜତାବାର ସାଙ୍ଗେ ଶାନ୍ତିଥି ଦୁହିକଁର ଭିତରେ କ୍ଷମତା ହସ୍ତାନ୍ତର ହେବା ବଲି ଆଶ୍ ରଖିଛନ୍ । ଇନେଇକରି ମୋଦି ଟୁଇଟ୍ କରିଛନ୍ ।
