ଲଗତାର୍ ଦୁଇ ବଛର୍ ହେବା ଜଗନ୍ନାଥଙ୍କର୍ ନାଗାର୍ଜୁନ ବେଶ୍

କାହିଁ ୨୬ ବରସ୍ ଉତ୍ତାରୁ ହେବାକେ ଯାଉଛେ ପୁରୀରେ ବଡ୍ ମହାପୁରୁ ମାନକର୍ ନାଗାର୍ଜୁନ ବେଶ୍। ଚତୁର୍ଦ୍ଧା ମୂର୍ତ୍ତୀ ଆଏବାର୍ ନଭେମ୍ବର ୨୭ ତାରିଖ୍ ଦିନ ବୀର୍ ବେଶେ ସଜେଇ ହେବେ। ବାକି ଇହାଦେର୍ ଇ କୋରୋନାର ପ୍ରକୋପ ଭିତରେ ସରକାର କରିଥିବାର୍ ସବୁ ନିୟମ୍ ଅନସାରେ ହିଁ ନାଗାର୍ଜୁନ ବେଶର୍ ସବୁ ବିଧି କରାଯିବା ବଲିକରି ଶ୍ରୀମନ୍ଦିର ପ୍ରଶାସନ୍ ତରଫନୁ କୁହା ଯାଇଛେ। ବାକି ଇ ସବୁ ଭିତରେ ସବୁନୁ ବଡ୍ ଅସବିଧାଟା ହଉଛେ ଯେ ମହାପୁରୁ ମାନକର ଇ ବେଶ୍ କେ ଭକ୍ତମାନେ ପାଖୁ ଦର୍ଶନ କରବାର୍ ଅନୁମତି ନାଇନ। ହେଥିରଲାଗି ଖାଲି ରାଏଜ ନାଇ, ସାରା ଦେଶୁ ଆର୍ ସାରା ସଁସାରୁ ଯେନ୍ ଭକ୍ତ ମାନେ ଇ ବେଶକେ ପୁରୀକେ ଆସିକରି ଦର୍ଶନ କରବାର୍ ଆଶ୍ ରଖିଥିଲେ ସମକର୍ ମନଦୁଖ୍ ହେଇଛେ। ବାକି ପଣ୍ଡିତ୍ ଆଜ୍ଞା ମାନେ କହିଛନ୍ ଯେ ଆଏବାର୍ ବଛର୍ ୨୦୨୧ ନଭେମ୍ବର ୧୫ ନୁ ମାହାପୁରୁଙ୍କର୍ ଇ ବେଶ୍ ଫେରଥରେ ହେବା। ଇକଥା କେ ଜାନିକରି ଭକ୍ତମାନେ କେତନିକେତେ ଖୁସ୍ ହେଇଛନ୍।

ନାଗାର୍ଜୁନ ବେଶ୍: କିଛି ଖାସ୍ କଥା
୧- ନାଗାର୍ଜୁନ ବେଶ୍ ଥି ମାହାପୁରୁ ମାନେ ବୀର ବେଶେ ସଜେଇ ହେସନ୍ ।
୨- ଇଥି କାଲିଆ ଆର୍ ବଲିଆ ଦୁହି ଭାଏ ନାଗା ବେଶ୍ ହେସନ୍ ଆରୁ ତାଙ୍କର୍ ବୁହେନ୍ ସୁଭଦ୍ରା ଭୁବନେଶ୍ୱରୀ ବେଶେ ସଜେଇ ହେସନ୍ ।
୩- ଇ ବେଶ୍ ଟା ବହୁତ୍ ପୁରାତନ୍ ତ ନୁହେଁ କିନ୍ତୁ ସାରା ବିଶ୍ବନେ ବିରଲ୍ ଆଏ ବଲିକରି ସଂସ୍କୃତି ଗବେଷକ୍ ମାନେ କହେସନ୍।
୪- ଆଘୋର୍ ସମିଆନେ ଶ୍ରୀମନ୍ଦିର ଉପରେ ହେଇଥିବାର୍ ଅନେକ୍ ଆକ୍ରମଣ୍ ବିରୋଧନେ ଲଢିକରି ନାଗା ବାବା ମାନେ ଯେନ୍ ପ୍ରକାର୍ ବୀରତା ଆରୁ ସମର୍ପଣ୍ ଦେଖେଇଥିଲେ, ସେଟା କେ ମନେ ପକେଇକରି ବି ମାହାପୁରୁମାନକର୍ ଇ ବେଶ୍ ହେଉଥିବାର୍ କିମ୍ବଦନ୍ତୀ ରହିଛେ।